Hurmatli abonentlar!

Butun dunyoda bo‘lgani kabi, O‘zbekiston hududida ham qonunchilikda o‘rnatilgan tartibni chetlab o‘tib, noqonuniy tarzda xalqaro aloqa xizmatlaridan foydalanish oxirgi paytlarda juda ko‘p tarqalgan firibgarlik turlaridan biriga aylandi.

Mazkur firibgarlikning mohiyati shundan iboratki, xalqaro aloqa ulanishlarini uzatish uchun firibgarlar noqonuniy yo‘nalishlardan foydalanishadi, boshqacharoq qiliba ytganda, qo‘ng‘iroq operator kanallari orqali emas, balki maxsus bog‘langan uskunalar orqali amalga oshiriladi. Shu sababli operatorga katta zarar yetkaziladi, abonent esa muloqot uchun pul to‘lagani holda yetarlicha sifatli xizmat ololmaydi.
Ushbu turdagi firibgarlikning yana bir xavfli jihati shundaki, mazkur noqonuniy faoliyatga oddiy fuqarolar ham jalb qilinadi. Firibgarlar jismoniy yoki yuridik shaxslardan uyali aloqa operatorlarining SIM-kartasini sotib olib, xalqaro aloqa xizmatlaridan noqonuniy tarzda foydalanish uchun uni ishlatadilar.

Bunday til biriktirishlarning xavfliligi quyidagilarda namoyon bo‘ladi:

Birinchidan, foydalanuvchi uyali aloqa operatori bilan xizmat ko‘rsatish borasida tuzilgan shartnoma shartlarini qasddan buzadi, bu esa shartnomaning bekor qilinishiga olib keladi.

Ikkinchidan, abonent nomiga rasmiylashtirilgan va firibgarlar tomonidan ishlatilgan telefon raqamlarining hisobidagi qarzlarini o‘z vaqtida to‘lash majburiyatini oladi. Bunday hollarda, qarz miqdori firibgar foydalanish uchun tovon sifatida abonentga taklif qilgan miqdordan sezilarli darajada oshib ketishi mumkin.

Uchinchidan, SIM-kartani sotgan shaxs, buning evaziga olgan mablag‘i hajmiga yoki firibgarlarning g‘ayriqonuniy faoliyati sababli yetkazilgan zarar miqdoriga qarab, noqonuniy tadbirkorlik faoliyati va firibgarlikdagi  ishtiroki uchun ma’muriy yoki jinoiy javobgarlikka tortilishi mumkin.

Bunday holatlarning oldini olish uchun, o‘z nomingizga rasmiylashtirilgan SIM-kartani har qanday holatda ham uchinchi shaxslarga bermasligingiz kerak va vaqti-vaqti bilan nomingizga ulangan raqamlar sonini Kompaniya bosh ofislarida tekshirib turishingiz tavsiya etiladi.

Agar o‘zingizga bo‘lgan qo‘ng‘iroq xorijdan ekanligini bilsangiz, lekin telefoningiz O‘zbekiston operatorlaridan birining telefon raqamini ko‘rsatsa, demak, bu xalqaro aloqa xizmatlaridan noqonuniy foydalanilganligining aniq belgisidir. Bunday hollarda 8123 raqami orqali Ucell abonentlarini qo‘llab-quvvatlash xizmatiga qo‘ng‘iroq qilib yoki Kompaniyaning bosh ofislariga murojaat etib, telefoningizda ko‘rsatilgan raqam haqida ma’lumot berishingizni so‘raymiz.
Shu tariqa, siz sifatli aloqa xizmatlariga bo‘lgan o‘z huquqingizni himoya qilasiz va firibgarlar harakatlarini kamaytirishda operatorga yordam berasiz.

Hushyor va ehtiyotkor bo‘ling!